中環出更：中學上堂睇漫畫馬榮成斷正受罰
科技發展迅速，依家愈嚟愈少人會睇書，以前睇書係一種樂趣。多名政界人士早前出席香港金閱獎頒獎禮時，都講起以前睇書嘅趣事，著名漫畫家馬榮成話自細鍾意畫畫，因此亦鍾意睇書入面嘅畫，中學時冇乜心機讀書，上堂成日睇漫畫書，仲話試過被老師發現後受罰添！
馬榮成話最近遇到數學老師，老師都話知道佢平日上堂冇心機，掛住畫畫。佢話就算會被老師罰，都無損佢對畫畫嘅興趣，媽媽都曾覺得畫畫冇出息，反對佢畫畫，後來覺得佢有天分先接受咋，依家連佢女兒畫畫都好有天分，仲喺外國修讀動畫設計添！
梁紀昌細個趁剪頭髮睇書
講起細個睇書，運輸及房屋局前局長張炳良就話細個試過夜晚唔瞓覺，喺被鋪下開個電筒照住嚟睇書，媽媽有時可能都知佢咁做，但唔太離譜就算數嘞！鮮魚行學校前校長梁紀昌就話細個屋企好窮，買唔起書，剪頭髮就最開心，每次幫襯都可以免費任睇書，會預全日去剪頭髮，打書釘打到飯都唔食，細個鍾意睇《三國演義》同《孫子兵法》喎。
睇書唔止係個人活動，仲可以同好朋友一齊睇，都有好多得着o架！天文台前台長林超英話細個鍾意睇太空探險等科學普及書，當年都係啱啱開始諗點樣上太空，有幾個相熟朋友一齊睇《地深探險記》等科幻小說。至於註冊營養師潘仕寶就啱啱出咗本食譜，講開食嘢，佢話依家好多人追求健康，食嘢食到「癡迷症」，例如所有嘢要有機、全天然，好執着，食嘢健康係重要，但咁樣令到自己瞓唔着就唔得咁話。
卓妮