政情：應付高鐵通車 馬時亨直踩19粒鐘
廣深港高速鐵路香港段耗資超過八百億元，興建過程出現過唔少爭議，但終於喺日前順利通車。而為免通車初期有任何甩漏，連港鐵主席馬時亨都直踩十九粒鐘，果然係嚴陣以待！
馬時亨為咗應付高鐵通車而坐鎮西九龍站，通車首日就一直留喺作戰室掌握第一手通車情況，朝早五點就到場喇，果然夠晒緊張。而佢搭過首班車去福田後，就工作直踩至晚上十一點幾，待尾班車抵達西九龍站先走，其中佢仲走到去迎接尾班車市民，當中有小朋友乘客正日生日，更獲得馬時亨送上高鐵紀念品。
等咗45分鐘先食到嘢
另外，馬時亨亦有去巡視西九龍站內其他情況，連觀景台都唔放過，果然係𥄫到實一實。而馬時亨又有肥亨嘅花名，直踩十九個鐘當然要醫肚，但西九龍站喺通車初期就人山人海，逼滿咗候車乘客同埋參觀嘅市民，所以食肆都特別旺場，雖然佢貴為港鐵主席，但都無特權要乖乖攞籌等位，最後足足等咗四十五分鐘先醫到肚，唔知佢滿唔滿意呢個輪候時間呢？