政情：何民傑倡學星洲 圖書館設漫畫角
今屆區議會，每名議員有一萬元外訪撥款，當中有唔少區議會都選擇去新加坡作考察。過去就有議員由新加坡帶咗由污水過濾而成嘅飲用水返港，而西貢區議員何民傑（Raymond）就喺當地參觀圖書館，認為可以作借鏡喇！
提升小朋友閱讀興趣
Raymond見到當地圖書館設有漫畫角，漫畫種類亦繁多，好似有美國嘅英雄漫畫。佢覺得可以從漫畫入手，吸引小朋友嘅閱讀興趣，又可以畀多個途徑佢哋學英文。而更令佢覺得應該要學習新加坡，係因為覺得香港培育閱讀風氣方式十年如一日，一路都只係單靠閱讀報告，成效唔夠顯著。
出年就到區議會換屆選舉，Raymond早前被指會加入熱廚房而吸引唔少人落區工作，即使最後未進身官場，但地區上仍然有傳佢唔會再參選。但佢話鍾意從事地區工作，再加上見佢頻頻拍片介紹地區消息，又會輕鬆吓大講美食，好似最近就介紹急凍榴槤，睇嚟係諗新方法吸引街坊注意喇！