政情：黃雨代言人捧場 岑智明受寵若驚
香港天文台前日傍晚因暴雨發出咗黃色暴雨警告信號。不過，原來發出黃雨前早有「徵兆」。話說天文台台長岑智明前日中午出席一個午餐講座時，就見到被網民稱為「黃雨代言人」嘅藝人馬浚偉，真係夾都冇咁蹺。
諗幾秒至記起叫馬浚偉
岑話前日中午應香港資訊科技商會邀請，出席一個講座，活動主人家向佢介紹一位嘉賓。岑面對呢位嘉賓都諗咗幾秒，諗緊係「皇上」定「志摩」，後來先記起係「黃雨代言人」馬浚偉。岑又話諗唔到馬浚偉會專程出席資訊科技界活動，嚟捧佢場，聽佢嘅講座，令佢受寵若驚。
二○一四年馬浚偉有份演出嘅劇集大結局播出當晚，香港落暴雨，多區水浸，但天文台起初都只係發出黃雨警告。而馬浚偉喺劇中因水浸而不停游水，正好黃雨圖示出現喺電視機畫面，馬浚偉自此被稱為「黃雨代言人」喇！岑前日就喺社交網站上載咗同馬浚偉喺午餐會嘅合照，仲笑言最終前日都要出番個黃雨，要等馬浚偉游吓水咁話。