政情：中環出更：直播暫租住屋抽籤 似睇六合彩攪珠
房屋協會今日為漁光村「暫租住屋」過渡性房屋計劃進行電腦抽籤。房協主席鄔滿海可能想搞搞新意思，呢次有別於一般召開記者會進行抽籤的做法，而係首度將抽籤程序搬到其官方Fackbook專頁進行網上直播，市民喺今日下晝兩時半就可以一睹抽籤過程嘞！
網上公布優先次序 再編配單位
房協推出香港仔漁光村約二百個小型空置單位作暫租住屋單位，呢次計劃累計收到一千三百四十六份申請，超額申請五點七三倍，平均約七名申請者爭一個單位。中籤機會好似中六合彩咁，六合彩都有得直播，房協有見市民「爭崩頭」，決定直播抽籤，提高透明度。
直播過程中會先抽出「種子號碼」，房協再將以上號碼輸入電腦進行抽籤排序，最終得出申請人嘅優先次序號碼，仲會喺房協網頁公布，供市民參閱，繼而進行編配單位程序。
漁光村暫租住屋過渡性房屋租期長達五年，供輪候公屋三年或以上的年滿六十歲單身長者，以及二至三人家庭申請。建於六十年代嘅漁光村預計最快二○二三年開始清拆及重建。
卓妮