政情：中環出更：郭偉強畫工麻麻細個唔肯交勞作
唔係每個人都有藝術天分，立法會議員郭偉強出席「文化森林2018」藝術展覽時，就講起自己細個唔鍾意美術科，畫畫唔係畫得咁靚，仲試過唔肯交勞作，被老師催佢，話如果再唔交就入唔到心儀嘅中學添！原來唔交一份勞作功課都咁大鑊o架 ？真係第一次聽喎。
郭偉強話自小都唔太鍾意美術科，讀小六時，有份勞作功課一直拖咗好耐，點都唔肯交，老師就話如果佢再唔交，就唔可以畀佢合格，而當時學校推薦佢入一間中學，要求佢要全部科目合格才會收佢，所以最後佢都被迫交番嗰份功課，分數都唔太低o架 ，但至今都唔係咁鍾意美術，而阿仔都遺傳咗佢嘅基因，畫畫都係麻麻地，佢話只要教到阿仔最少識欣賞下藝術就得啦！
余鵬春去完旅行精神咗
講番今次嘅展覽，有多位修讀設計嘅同學都有份參展，而佢哋嘅作品亦有得獎，包括喺英國修讀平面設計嘅陳彥霖就打算再修讀有關品牌嘅課程；另一位修讀時裝設計嘅得獎同學吳珮榆就話已獲理大取錄，但打算先休學一年，參與一個有關時裝科技嘅比賽，因為時裝設計嘅履歷好重要，而呢個比賽亦好難得，好彩家人都支持佢嘅決定。今次活動有份籌款嘅胡池就話，想用今次活動支持呢啲修讀藝術嘅同學。
轉頭喺中總世界華商高峰論壇，撞到國貨公司後人余鵬春（PC），成個人好似精神咗咁，原來佢最近同家人一齊去咗墨西哥旅行，去咗睇金字塔，仲去潛水同游水添，聽落認真寫意。
卓妮