政情：有相為證：林琳着婚紗揸車 法國周街走
唔少準新娘子，為求影到一張靚靚婚紗相，真係上天下海做乜都得。荃灣區議員林琳早前去咗法國影婚紗相，同樣着住婚紗揸車入油，聽落好似拍電影咁特別，以為佢都係為咗影張靚相啦，問番佢竟然冇乜特別原因喎，原來佢純粹係懶先唔換番套婚紗落嚟咋！
影完相懶得換便服
林琳話未婚夫冇國際車牌，架車係自己租嘅，佢本身着住便服揸車去影相，之後就搵啲嘢遮住車窗，再瞓喺車廂後座換婚紗，影完又懶得再換番便服咁麻煩，於是就着住婚紗揸車同入油，仲足足去咗三間油站先入到油，因為唔係間間都收香港信用卡o架！
之後佢繼續着住套婚紗還咗部車同搭的士，再行返酒店，佢話好彩有帶拖鞋去，橫掂睇佢唔到，佢喺薰衣草園影相都係着拖鞋，真係攰死人咁話喎。着住套婚紗周街走咗咁耐，睇嚟佢都相當靈活呀吓！