政情：鐵路爆醜聞 拆局時機到 傳黃遠輝獲薦掌房屋

工程屢出事 證運房局超負荷

運輸同房屋係香港兩個舉足輕重嘅政策範疇，不論係公屋輪候時間突破五年、鉛水事件、私樓樓價屢破頂等房屋事務，抑或係高鐵、港珠澳大橋工程等交通基建工程超支延誤，統統由運房局負責，結果啲問題處理得幾差，如同局長陳帆咁講，相信公眾「有目共睹」。現屆政府亦深知運房局職責過重，喺上個月回顧上任一年時就提到有意將運輸同房屋分拆成兩個政策局。

其實上屆政府已提出分拆運房局嘅建議，最後因立法會拉布而擱置，今屆政府唔敢輕言拆局，就係怕立法會內未有共識。建制陣營一向支持拆局，泛民各板塊近日亦放軟口風，好似民主黨承認運房局嘅工作量係超負荷，公民黨亦指土地同房屋應由一個政策局作一條龍處理，似乎綠燈已開。拆局條件漸齊，最後嘅藥引，或者係沙中線造假醜聞。

陳帆宜管運輸 要繼續執手尾

有資深政界中人分析指，爆出醜聞後，輿論普遍認為運房局喺事件上監管不力，政府大可以利用呢股不滿，「力證」運房局工作量太多，顧唔掂咁多嘢，大條道理將運輸同房屋拆開。該名人士仲話將來房屋局嘅局長大可以搵有「公職王」稱號嘅Stanley出任，指對方近年先後出任房委會資助房屋小組主席、長遠房屋策略督導委員會委員同土地專責小組主席等房屋事務公職，相信對方可以駕輕就熟。至於運輸，既然陳帆任內一年已發生咁多風波，就應該由佢繼續執手尾咁話。

陳帆早前公開講過假如要拆局，佢個人希望主理房屋，明顯係想將運輸交通甩手唔理。到時真係拆局，莫講仲想揀做邊一個局，陳帆有得留低都算偷笑，睇佢喺沙中線造假醜聞嘅卸責表現，相信引咎落台嘅選項先係社會共識。