中環出更：VR推廣盂蘭節 胡炎松不斷創新
要成功舉行一個活動，背後其實有好多人付出心血，花咗無數個晚上作統籌，尤其係舉行咗幾年嘅活動，更加要絞盡腦汁先可以維持新鮮感。盂蘭文化節總統籌胡炎松都相當有同感，佢仲話驚自己江郎才盡，睇嚟真係承受唔少壓力喎。
胡炎松近年積極推廣潮汕文化，每年都會趁住盂蘭節將至籌備盂蘭文化節，今年更係連續第三年舉辦，繼續有搶孤競賽。不過，活動亦加入新元素吸引參加者再次參與，好似引入機械鯉魚、VR（虛擬實境）技術等。
講起活動已經搞咗三年時，佢大嘆每年都有種江郎才盡嘅感覺，因為覺得以嘉年華形式舉行唔能夠持續，所以要不斷創新。為咗突破樽頸，佢會觀察唔同祭祀儀式搵靈感，又自言有危機感，所以唔會一次過推出所有新元素，會留一手咁話，仲賣關子話目前嘅橋夠出年用添！
香港潮屬社團總會主席陳幼南同永遠名譽主席莊學山都有嚟撐場，而立法會議員姚思榮過去幾年都有參加搶孤競賽，佢憑觀察已得出一套心得，就係靠身高優勢同埋夠撞得，而身形薄弱嘅佢最適合嘅位置就係領隊喎，所以已經諗緊議會中有咩合適人選可以組隊。
林月萍愛潮州粥 家庭傳承
有心人幫手推動傳統文化當然係好事，但家庭都係傳承文化中不可或缺嘅一環，好似香港潮屬社團總會會董林月萍就因屋企關係，而保持煲潮州粥嘅習慣，不但愛上呢種味道，亦可以回味以前媽媽下廚嘅日子。另一位會董李嘉莉亦因屋企人關係與潮劇結緣，佢認為要推動潮劇文化，就需要淡化宗教色彩，否則就好難進入教會學校宣傳，影響傳承成效喇！
卓妮