中環出更:肥彭又回魂 插嘴陳浩天演講風波

保安局考慮以《社團條例》禁止香港民族黨繼續運作,香港外國記者協會(FCC)就邀請該黨召集人陳浩天喺下星期二出席午餐會演講,事件鬧到滿城風雨。末代港督彭定康(肥彭)尋日又回魂,稱中國外交部要求FCC取消演講嘅做法係完全錯誤(quite simply wrong)喎!

對港指指點點 死唔斷氣

肥彭接受外媒訪問時話,冇理由因為唔鍾意他人嘅言論而作出審查,喺法治下嘅開放社會,言論自由係其中一個象徵,亦受《中英聯合聲明》保障。仲話自己一直都反對香港獨立,但同時會就香港嘅自由、地方自治而發聲。佢亦批評,今次外交部介入屬香港自治權範圍內嘅問題,係完全錯誤。講咁多嘢,其實佢自己都已經過晒氣,更加唔應該對香港事務指指點點啦!

FCC尋日亦發表聲明,話以前都曾經邀請唔同立場嘅講者,就有關政治、經濟或藝術等發表演講,主辦有關活動唔代表佢哋會支持或反對講者嘅立場,過往內地、香港同埋其他地方嘅政府代表和其反對者,亦曾獲邀演講,未來佢哋都會繼續咁做。

聲明仲話,相信該會會員同埋公眾有權去聆聽唔同意見,而香港一直以擁有法治、言論自由為榮,該會尊重香港嘅法律,同埋支持亞洲各地嘅言論及新聞自由,相信香港作為一個自由社會,即使有人持不同意見,但容許市民自由發言和辯論係極之重要。

卓妮

第一手消息請下載on.cc東網iPhone/iPad/Android/Windows Phone Apps