政情：趕蛇救蛙 馬仁威被封青蛙王子
俗語話「救人一命，勝造七級浮屠」，其實就算唔係救人，只係拯救一條生命都已經好偉大。M超跑會主席馬仁威（Kelvin）最近喺南區屋企附近公路，見到一隻被毒蛇咬住嘅青蛙，佢就二話不說即刻用樹枝打走條蛇，成功救青蛙一命。呢段短片上載到社交網站後，其朋友都大讚佢英雄救美，仲話佢好似青蛙王子咁有型添。
心噏野豬家庭遭宰殺
Kelvin話當日事出突然，所以都冇諗咁多已出手，好彩青蛙只係被咬住隻腳，先至救得番。之後有漁農自然護理署人員話佢知，原來條蛇有劇毒，佢聽完先知驚。
講開屋企附近嘅動物，Kelvin話有個野豬家庭都經常令佢心掛掛。話說早前有一隻野豬媽媽經常喺黃昏帶住五隻小豬落山搵食，由於小豬太可愛，深受鄰居喜愛，好多人會特登攞食物餵佢哋，而工人姐姐放狗時亦經常同小豬一齊散步，畫面十分溫馨。不過幾個月前，有「城市獵人」出現，野豬家庭慘被宰殺，依家剩番一隻豬女，佢諗起都心噏咁話。