政情：陳國強嗌錯潘國山做方國珊

剛相識叫錯人哋個名一啲都唔出奇，不過做咗成三年同事都仲叫錯名，睇怕都要請飲茶喇。話說早前沙田區議會開會，當區議員陳國強就將其同事、同為當區議員嘅潘國山，叫錯咗做西貢區議員方國珊。潘同方屬唔同區議會，仲要一個男、一個女，咁都叫得錯，離譜咗啲喎。唔怪得陳都話要同潘飲茶喇。

陳國強喺當日會議原本講起區議員座位編排，話自己因為係獨立議員，坐埋咗一邊，又話成日都會同同一圍枱嘅區議員鬧交。之後佢就講起坐佢對面嘅潘國山，點知就一時口快快講咗「對面嗰個方國珊」，引來全場大笑。

陳知自己嗌錯後都想糾正，點知又記唔起潘個名，問︰「唔係，嗰個咩話﹖」最後要附近嘅議員提佢，先叫番啱潘個名。有議員都笑佢︰「男同女嚟o架喎，咁都搞錯？」陳之後仲死撐話方國珊同潘國山「有啲類似」，兩位都對政治唔太強烈，亦都好多朋友咁話。呢個解釋似乎牽強咗啲喎。