政情：九西爭補選議席建制鬥放風角力

前食物及衞生局局長高永文、前政制及內地事務局局長譚志源等前高官一直盛傳是代表建制派出戰九龍西補選的理想人選，而經民聯亦屬意黨內的深水埗區議員梁文廣出戰，可惜拖拖拉拉，至今仍未有定案。消息指，譚志源無意再入政圈，而有關方面亦多番游說高永文出戰，但高早已私底下表明不會出戰，有關方面於是向曾經與高並肩作戰多時的前食衞局政治助理陳凱欣埋手。

陳凱欣未表態 被指憂見光死

雖然陳凱欣獲推舉，但遲遲未就參選意向表態，只一直指高仍未決定會否參選。建制圈中有講法是她有意借高作掩護，唔想咁早表態，擔心會「見光死」。不過，推舉梁文廣出戰的經民聯就對此感到不滿，認為建制派應盡早確定理想人選及對外公布，以便盡快展開選舉工程，準備充足以迎戰民主派候選人。

傳出經民聯不滿後，隨即又有人放風話經民聯意圖令陳凱欣「見光死」，但該黨已否認。至於點解早啲宣布參選會「見光死」，咁就唔知喇，莫非唔見得光嘅？不過，建制派中人埋怨，陳連區議員都唔係，只要答應參選，建制派就要全力助選，聲都冇得聲，仲要擔心佢當選後係咪會企喺建制派嗰邊。

梁文廣對參加補選仍存希望

拖拖拉拉，高永文尋日終於公布決定唔參加補選，解釋經評估後，認為勝出選舉係無可能兼顧議會、臨床工作同其他義務工作，因為目前嘅臨床工作都幾忙，而且醫生同病人關係要非常緊密，更講到如果做唔到稱職嘅議員，係對唔住自己、病人同社會喎。

梁文廣就明言，建制派目前仍未完成協調工作，而佢仍然等待協調工作完成，睇嚟佢仲對代表建制派出戰存有希望。佢仲話，希望建制派能夠團結一致，面對日後各項選舉，望協調出嚟嘅人選可以獲建制派同意同全力幫助。如此看來，梁似乎只係一個大後備，經過一輪拉鋸後，唔知選舉時仲係咪可以全力幫手助選嘞。