中環出更：暑假遊北海道盧偉國歎美食

暑假立法會同行政會議都休會，唔少政圈人士都會趁呢段時間去旅行放鬆一下。一向對煮嘢食有研究，經常分享佢嘅「盧家私房菜」菜式心得嘅工程界立法會議員盧偉國（WK），最近就去咗日本北海道周圍食好嘢，有日本出嘅無色透明可樂、赤肉蜜瓜、豚丼同生蠔，淨係聽到都流晒口水喇。

WK嘅「盧家私房菜」曾經介紹過整「肥燶瘦叉燒」同有「黯然銷魂飯」之稱嘅叉燒煎蛋飯。今次佢喺北海道帶廣市一家經營咗八十五年嘅餐館食完豚丼後，就大讚係佢食過最好嘅日式豚丼，因為該豚丼係用上好嘅豬肉嚟炭燒，再配上新潟縣佐渡市嘅白米，連醬汁都有濃郁嘅炭燒香味。佢仲話同佢嘅「黯然銷魂飯」有得比喎。

而立法會議員黃碧雲（一舊雲）就同老公去咗加拿大多倫多，仲慶祝埋老公生日添。而佢老公生日當日，佢哋就去咗食龍蝦餐，近八磅嘅加東龍蝦用咗中西合璧嘅煮法，即避風塘炒龍蝦，再伴炸薯條同炸小銀魚，真係十分有創意。

而一舊雲之後仲搭船去咗安大略湖湖心島（Center Island）。佢話當地湖畔有音樂表演、亦有人帶住耳機跳「寧靜的士高」，仲可以欣賞吓嗰度嘅裝置藝術，大嘆喺嗰度散步，真係舒適寫意咁話。

而本身係行會成員嘅安老事務委員會主席林正財亦都飛咗去美國，仲去咗阿拉斯加州德納里國家公園（Denali National Park）同薩米特湖（Summit Lake），影咗唔少靚相添。

卓妮