政情：張建宗愛儲剪報 老婆投訴養白蟻
政務司司長張建宗以前曾經講過日睇十四份報紙，佢尋日出席一個同青年人對談嘅活動時再透露多啲對報紙嘅熱愛，搞到連太太都投訴添！
張建宗話自己有剪報習慣，仲剪到周圍都係，所以太太都忍唔住話佢遲下會搞到白蟻都生晒出嚟囉！另外，佢太太都唔明白佢剪報為乜，仲同佢講網上都有得睇新聞，但佢就話報紙同舊書都有陣書卷味道，所以先吸引到佢去睇。
返工唔開新聞台會空虛
另外，佢自言為「新聞狂」，自細就開始追新聞，所以依家唔睇新聞唔舒服，連工作時都要開住新聞台，否則會覺得空虛喎。
除咗鍾意睇新聞，佢都鍾意做運動，其中一項運動就係一人踢足球，自己扭波，又對住幅牆當踢十二碼。聽落好似好悶咁，但佢就話呢個踢波方法極之激烈、夠強度，而平日就習慣早上五點半起身做運動，仲係十年如一日添！