政情：郵輪碼頭淪死城佛系副局等運到
啟德郵輪碼頭自一三年啟用以嚟，人迹罕至一直為人詬病。立法會財務委員會尋日審議商務及經濟發展局提出一個專門監督啟德郵輪碼頭同迪士尼樂園度假區嘅職位變常額時，包括勞工界何啟明在內多名議員鬧爆郵輪碼頭空空如也，猶如「死城」，財委會主席陳健波（波哥）都忍唔住加把口，揶揄在席嘅商經局副局長陳百里係「佛系思想」，以為問題會自行解決。
交通唔方便 規劃冇溝通
其實，商經局為監督啟德郵輪碼頭同迪士尼樂園特意開設一個首長級丙級政務官職位，月薪高達近十八萬港元，過往呢個位置係合約制，但續過幾次約後，商經局尋日提交到財委會要求將個職位變成常額。唔少議員都質疑其成效，其中何啟明話啟德交通唔方便，有關規劃亦都冇同附近三個區議會溝通，質問政府有乜規劃？
何啟明仲鬧埋郵輪碼頭嘅配套，例如開設包括親子餐廳、可以開百圍嘅酒樓等，呢啲都唔係畀上落郵輪嘅遊客用嘅餐廳，反而搞墟市先係比較本地化嘅措施，但人流少嘅問題就解決唔到，好似天水圍天秀墟市咁，市民喺天橋上冇樓梯落去都畀人鬧，啟德咁偏僻又點叫人去？
在席嘅商經局副局長陳百里解釋，郵輪碼頭嘅定位係吸引遊客同船次，消費都係其次，而過去幾年郵輪碼港抵港船次數字理想，政府滿意本港郵輪旅遊業發展，當局亦已將周邊嘅土地列入賣地表中，日後如果落成咗附近一啲住宅、商場、商業大廈等，人流就會增加番。
但何啟明聽完即刻就反駁，話陳百里講啲配套同碼頭距離好遠，係要坐車先至去到，所以都唔會增加人流。講到呢度，波哥都忍唔住加把口：「可能（副）局長有佛系思想，到時問題自然會解決。」實行同何啟明夾擊政府。
雖然啟德郵輪碼頭嘅爭議好大，但最後都以十七票贊成、十五票反對、零票棄權下通過咗呢個職位變常額，睇怕呢位官員都要勤力做啲成績出嚟，否則都會畀人鬧爆係佛系喇！