中環出更：偷出夜街飲酒郭棟強靠「暗號」入屋
細路仔總會犯錯，最重要係改過自新。以傳遞更生訊息、協助更生人士為宗旨嘅香港睦群助更生協會日前舉行創會典禮，當日出席人士都講起大家嘅百厭史。協會會長郭棟強自爆十幾歲時非常反叛，雖然屋企有「門禁時間」，父母規定夜晚十一時就鎖門，但佢依然偷偷地去同朋友飲啤酒，為咗有得返入屋，惟有同兄弟姐妹夾好「暗號」，到時可以開門畀佢喎。
用「三長兩短」相隔方式敲門
郭所講嘅暗號其實係敲門方式，敲門相隔時間係「三長兩短」，兄弟姐妹聽到就會開門畀佢。不過佢話，細個屋企環境唔好，所以都只係百厭，並冇學壞，佢又希望社會可以畀到更生年輕人正面訊息。協會創會董事局主席何偉權話，自幼住喺貧民區，見到身邊朋輩有啲加入黑社會，有啲染上毒癮，所以當時已立志想幫人行正道。依家成立協會，都算係達成志願喇，難怪佢太太馮潤珍同兒子何永輝都嚟撐場。
同場仲有曾任懲教署署長嘅邱子昭同立法會議員麥美娟（Alice）。邱話，佢爸爸係警察，細個時對佢好嚴格，後來佢有女兒，就明白身教好重要，細路仔會有樣學樣，所以佢喺女兒成長時期都會做個好榜樣。社會上對年輕人有唔少批評，佢就話其實年輕人質素唔差，有次佢喺機場唔小心倒瀉咖啡，十分狼狽，有個後生仔都上前遞紙巾畀佢，希望社會多啲正能量。
麥美娟自爆英文默書捧蛋
而Alice就自爆小一時英文默書「捧蛋」，被媽媽「打到抽筋」，自此就畀心機讀書，之後小學年年考第一。佢好多謝媽媽畀佢咁深刻嘅記憶，令佢發憤讀書，認為嗰個年代適當體罰都係有用嘅。
卓妮