政情：中東擺珠寶展 冼雅恩入鄉隨俗

了解當地文化莫犯禁

冼雅恩以前參加過喺中東舉行嘅珠寶展。佢話嗰陣啲當地女性試戴珠寶時，佢都同平時一樣金睛火眼望實，避免有人順手牽羊、偷龍轉鳳。不過，原來當地女性雖然只需用頭紗遮住面部，但男性都唔可以直視佢哋任何身體部位。佢當時就犯禁望咗佢哋對手，好彩在場有其他女同事可以同佢交換崗位。

佢又話，去外國最重要係入鄉隨俗，行商場就可以了解當地文化。而同外國人營商更要事前做足功課，歷史、飲食、文化等都要了解一下，好似佢所做嘅珠寶款式都有顧及唔同國家嘅宗教背景，好似星形、十字架等就唔適合伊斯蘭教國家咁話。