世盃專版：周邊商品多海外版貼紙最搶手
世界盃熱潮席捲全城，除各隊球衣外，周邊產品亦有為數不少的「捧場客」。在旺角開設實體店Fansgoal專賣精品的Kenny，亦有因而增加貨品類型，以配合「世盃熱」：「除傳統受歡迎嘅貼紙同卡之外，精品方面亦返多咗貨，另外球星人偶公仔都準備多咗。」
與「非世界盃年」相比，Kenny表示今年生意額可望上升近一倍，當中最多球迷搶購的，仍然是世界盃球星卡及貼紙：「世界盃嘅卡、貼紙有一班球迷儲開，我哋挑選嘅貨都係外國版，呢啲係返極都唔夠賣！好似貼紙咁，外國版係682張，而香港版係670張，另外外國獨有嘅金色簿，我哋都會幫客人訂購。卡嗰方面，外國有隻叫『Premium Pack』，呢隻係香港冇，入面會多啲閃卡，客人買完香港版，因為唔夠閃卡，好多時候都會買埋呢套『Premium Pack』，所以銷量都好好！」
搜羅球星公仔 迎合球迷
除球星卡及貼紙外，Kenny亦迎合球迷口味搜羅迷你球星人偶：「今年新出嘅美斯、基斯坦奴朗拿度國家隊人偶，會特別入多啲，因為客人都係鍾意出名球星，另外阿根廷前鋒保羅戴巴拿嘅人偶亦比較受歡迎。」被問到看好哪一隊時，Kenny自然力撐愛隊德國能成功衞冕。