兩名電影製作人因為不當處理道具鈔票，被控管有偽造紙幣罪成，引嚟業界嘩然。商務及經濟發展局局長邱騰華尋日仲死撐法例無問題，只承認執行時有商討空間，仲話電影業界用道具鈔票拍攝冇問題，只需向金融管理局申請。不過金管局就被爆曾經拒批呢類製作道具鈔嘅申請，所謂嘅申請係咪一定得，似乎仍然講彩數。政府大大聲話支持電影業發展，但係邱騰華同金管局總裁陳德霖就互扯貓尾，業界自然覺得茫茫然、無所適從喇！
