政情：收料站：梁美芬促訂指引修例 釐清參選資格
近年立法會換屆選舉及補選，被視為自決派嘅人士不時被選舉主任裁定取消參選資格（DQ），但外界就質疑係基於乜嘢準則去DQ參選人。聽聞有建制派人士將盡快同政府商討，要求制訂清晰嘅指引或修改法例，等選舉主任可以有基礎去作決定。
指區選前需推出
近年選舉主任DQ參選人後，頻頻惹起爭議，選舉主任仲多次被人狙擊，甚至收到恐嚇信。立法會議員梁美芬近日去完內地訪問後返港，昨日同傳媒茶敍時總結行程經驗，提到將會約見律政司等相關政府部門商討制訂指引或修改法例，列明公職人員不可主張港獨或打倒國家政體，所謂公職人員包括官員、立法會議員及區議員，公務員亦可能包括在內。
佢估計，即使政府真係制訂指引或修例，未必喺立法會九龍西補選前能夠完成。但係明年區議會選舉涉及眾多參選人，故此喺區選前應該有需要推出。