政情：出席《城市論壇》遭滅聲 王國興譴責港台打壓言論自由
盛傳因被建制派不滿主持節目時處處偏幫民主派，最後被「篤死」失落食物及衞生局政治助理一職嘅港台節目《城市論壇》主持蘇敬恆近日再惹火頭，前立法會議員、廿三萬監察發言人王國興（阿王）尋日去信廣播處長梁家榮，指喺節目中遭蘇敬恆「熄咪」滅聲，因此提出強烈抗議，譴責《城市論壇》打壓言論自由。
促公開澄清及解釋
阿王致梁家榮嘅公開信中指出，佢喺六月三日受邀擔任嘉賓，卻喺節目尾聲被蘇敬恆指示工作人員「熄咪」，佢批評對方做法係「不禮貌、不公道、不公平及不尊重」，認為係打壓言論自由的粗暴行為，以及對佢本人嘅極大侮辱。阿王又批評對方喺節目中以「提醒的口脗呼籲公眾出席六四集會」，質疑係公器私用同「硬銷政治私貨」，違反港台自詡堅持公平同持平嘅立場，要求港台就事件公開澄清同解釋。阿王又話，為咗維護自己嘅尊嚴同言論自由，今後將不會出席由蘇敬恆主持嘅節目。蘇敬恆回應指，節目是理性討論的平台，希望在有限時間內盡量多聽不同人士意見。