政情：投票時間維持15粒鐘 聶德權被鬧離地

葉劉稱失望 抨擊其冇參選經驗

早前政制及內地事務局就投票相關問題進行公眾諮詢，政府大致決定暫不改變。至於投票時間會否縮短，聶德權話仲研究緊方案，所以仍維持十五個鐘。葉劉淑儀直言好失望，認為聶德權冇參選經驗，所以有啲離地。仲話如果選民有意支持某啲參選人，就算縮短時間都會去投票，一旦當局決定縮短投票時間，政黨會盡快適應咁話。葉劉仲提及一六年立法會選舉時，港島太古城投票站選民為咗投票，不惜大排長龍投到半夜兩點添。

有議員追問政府仲有咩配套措施？聶德權就話會考慮唔同嘅可行性，包括電子投票、畀票站工作人員、需要輪班工作嘅公務員提早投票，同埋提早畀公務員喺駐內地辦事處內投票。不過佢強調，呢啲方案需要考慮好多嘢，包括運送同埋管理問題，仲話預計要二○二○年換屆選舉先會實施到。

議員倡安排內地工作港人投票

聽到話畀公務員喺內地投票，包括陳克勤等幾位建制派議員就話，依家唔少香港市民喺內地工作或退休，希望政府可以安排佢哋喺駐內地嘅辦事處投票。曾經喺美國生活嘅專業議政莫乃光亦趁機為喺外地生活嘅香港居民發聲，要求政府要一視同仁。

不過聶德權就話，依家香港選民係以香港為常住地方，需要登記番香港地址。呢個議題好複雜，當中涉及法律問題，當局需要認真考慮。講開又講，其實香港政府唔止喺內地有辦事處，喺世界各地都有辦事處，點解政府只係研究畀喺內地工作嘅公務員投票，而唔理喺外國工作嗰班公務員呢？