中環出更：國泰又延誤 累梁耀忠缺席六四
因管理不善而喺全球最佳航空公司排行榜節節下跌嘅國泰航空，服務又出問題，令支聯會常委、街工立法會議員梁耀忠本周一（4日）首次缺席六四燭光晚會。梁耀忠尋日怒斥國泰安排差，訊息混亂，令佢困喺機艙內五小時，對未能出席晚會感到唔開心。
機艙困5句鐘 轟安排差
約一周前，梁耀忠向支聯會常委表示因有急事不能主持論壇，但會出席晚會，點知甩底。梁耀忠尋日親述情況話，上周六（2日）朝早佢飛往台北，至本周一（4日）下午約三時許，佢乘搭國泰航班原定下午五時許返港。誰知登機後，廣播通知因天氣問題會延誤約三小時，最終等咗五小時，期間有乘客下機，航班又要移泊位。佢批評國泰安排好差，乘客不知何時才可飛，亦冇其他安排，只提供雞肉卷作晚餐。本報向國泰查詢，但一直未獲回覆。
對於有指梁耀忠缺席集會係避免因支聯會綱領而影響日後參選，佢就話一直認同支聯會綱領，亦有參加今年六四遊行，重申任何口號都會繼續嗌。
卓妮