中環出更：香腸列致癌物 陳春利食完飲茶當「解藥」
飲茶益處多多，既可提神醒腦、去油解膩，仲可以當「解藥」添！早前喺一個台灣茶及飲料推介活動上，見到台灣「香腸大王」、中華肉品協會理事陳春利，講起三年前世界衞生組織宣布將加工肉類列為一級致癌物，以為做加工肉品生意嘅商家實好大鑊喇，估唔到陳春利笑笑口話生意不減反增，自己都照食不誤，然後飲多啲茶當「解藥」喎！
陳春利話，飲茶時自然就飲多啲水，茶葉可令身體變鹼性，亦可促進身體新陳代謝，從而減少加工肉類中添加嘅亞硝酸鹽對身體嘅影響。佢話其實亞硝酸鹽喺好多蔬菜中都有，世衞嘅指引並冇嚇怕消費者，無論喺台灣或香港，佢哋嘅銷量都有增長。咁講又真係幾令人意外。
林華琴藉茶促進家族感情
講開飲茶，港澳台灣同鄉會前會長林華琴都有飲茶習慣，佢笑稱最近跟住餐單減肥，好多嘢都唔食得，但係咖啡或茶仲飲得，證實茶真係好嘢喎。佢又話有位台灣朋友不時會包起台北木柵成座山咁大嘅茶園，一年兩次採收後分贈親戚朋友，所以佢屋企經常有靚茶飲。有時開壺靚茶同家人促膝閒談，仲可以促進感情添！
同場仲有遠東貿易服務中心主任倪伯嘉、台北貿易中心主任巫英臣，仲有一間連鎖台灣茗茶店嘅代理商陳錦泉。巫英臣話，台灣茶葉入口香港年年都有雙位數增長，來自台灣嘅珍珠奶茶店佔香港市場七成生意，可以話係港人至愛嘅台灣飲料。早排有一間台灣大學生至愛嘅珍珠奶茶品牌喺銅鑼灣開幕，排隊蛇餅甚至造成交通癱瘓，都幾誇張o架。
卓妮