能夠成為人氣南韓模特兒，必然有佢嘅長處，有啲靠靚樣，有啲則靠身材，至於薛萊娜就有齊晒呢兩樣優點，同時擁有一對修長美腿，加埋獨特嘅氣質，令人一見難忘，難怪人氣愈嚟愈嚟高。
如果想成為一位模特兒，唔少人總認為一定要有外在嘅條件，當然呢個絕對係必備條件，但更重要係得到家人嘅支持。於南韓首爾出生嘅薛萊娜，一直夢想成為模特兒，但係怕家人反對而唔敢講出口，只好埋藏心底。及至佢就讀大學時，喺一次偶然嘅機會下，被星探問佢有冇興趣做攝影模特兒，對於薛萊娜嚟講，絕對係圓夢嘅好機會，於是佢鼓起勇氣問家人嘅意見，卻估唔到原來屋企人十分支持佢，仲叫萊娜要好好把握機會，結果佢便到事務所簽約，先以兼職攝影模特兒身份工作試吓水溫，之後再考慮轉為職業模特兒。
事實上，萊娜被星探發掘並非偶然，皆因佢嘅外形確實相當迷人，不但擁有玲瓏浮凸嘅身材，更有一對修長美腿，簡直係吸引男士們眼球嘅利器。經過一段日子後，萊娜不但對於模特兒工作有更深入嘅認識，同時亦喺業界累積唔少人氣，2014年佢決定轉做職業模特兒。最令佢估唔到嘅係，事務所安排第一份工作，竟然係以賽車女郎身份喺賽事上登場，而呢次經驗相當難忘，發星唔少蝦碌事，幸好喺前輩嘅帶領下，最終都係有驚無險，順利完成工作。
經過呢次大型活動後，萊娜發覺自己演出經驗不足，於是佢問事務所有乜辦法可以令自己表現更好？事務所就推薦佢參加第3屆韓國賽車女郎大賽，讓佢透過比賽獲得專業嘅培訓之餘，同時又可以獲得大型活動嘅經驗，最重要係可以提升知名度，如此一舉三得嘅安排固然好，但係對於萊娜嚟講感到好大壓力，幸好喺一眾公司同事及前輩嘅教路下，萊娜一直殺入決賽，憑住過人嘅自信及迷人嘅外形，結果獲得最佳明星獎。經過呢次比賽後，萊娜嘅知名度大大提升，隨後工作量大增，不但以賽車女郎身份喺各個賽事中亮相，同時又化身成車模喺大型車展上登場，而佢每次出現都成為場內亮麗嘅焦點。
話說回來，點解萊娜喺比賽中突然充滿無比嘅自信呢？原來有前輩同佢講必定要有自信，搵吓自己有乜嘢地方比其他人優勝，咁唔使問，梗係一雙修長美腿啦，呢個優點絕對係令萊娜自信心爆棚！然而，人氣愈嚟愈高嘅萊娜，身形卻愈嚟愈圓潤，原來佢每次工作完後都會去擦大餐，加上缺乏運動，結果咪肥咗囉！萊娜曾試過地獄式減肥，邊節食邊勤力跑步，結果令小腿出現跟腱炎，佢表示家陣唔會再亂食嘢及做過量運動，反而會安排多啲休息時間，等自己無時無刻都保持最佳狀態。
簡介：相對唔少南韓模特兒嚟講，薛萊娜嘅樣貌相當有韓妹味道，尤其係佢嘅櫻桃小嘴，十分可愛，可能正係呢個原因，令佢嘅形象相當入屋。不過講到佢最強嘅賣點，就當然係一對修長美腿，真係百看不厭。如果大家想了解佢多啲，就要Click入呢個網站喇！
網址：http://cafe.daum.net/sulrena
出生地：首爾
身高：173cm
三圍：34-24-35
撰文：魂