政情：馮興禮攜蝴蝶酥 搵麥美娟破冰
仲記得早幾日立法會議員麥美娟（Alice）點評幾位政治助理，特別講到勞工及福利局政助馮興禮（Herny）。Henry當時睇到報道已即刻約時間拜會Alice，而呢個破冰會面尋日喺Alice嘅辦事處上演，而且Henry仲早有預備添！
普通交流 傾吓強積金
尋日喺立法會撞到Henry，佢話啱啱同Alice見咗面，仲透露帶咗蝴蝶酥去，當然有同對方講唔好意思。至於會面就只係普通交流，大家傾吓偈啫，所以都好快見完咁話喇！
而Alice都一樣話會面無乜特別，主要都係傾吓強積金事宜，之前Henry都有同另一名工聯會議員陸頌雄傾過。至於Henry送嘅蝴蝶酥呢，佢就借花敬佛畀咗同事嘞！其實政助同議員、政黨有會面實屬正常，但多啲保持聯絡同溝通，點都會令佢哋嘅工作變得順暢啲嘅。