政情：驚旺角大媽進駐觀塘 泛民拉布雞蛋挑骨頭
上屆政府提出喺全港十八區預留一億元進行「社區重點項目」，當中觀塘海濱音樂噴泉同灣仔摩頓臺活動中心爭議不斷，泛民尋日又喺小組委員會會議上繼續拉布，當中公民黨（公文袋）楊岳橋更將旺角「大媽」同觀塘音樂噴泉扯上關係，擔心大媽喺旺角行人專用區遭「殺街」後進駐觀塘，而建制派議員梁志祥反斥泛民「雞蛋裏挑骨頭」。
又質疑音樂噴泉嘥水
楊岳橋話近年本港多個公園都有大媽殺入，所造成嘅噪音滋擾影響民居，又話若果康文署能管理好，西洋菜南街就唔會遭「殺街」，問政府點樣避免將觀塘海濱音樂噴泉淪為另一個西洋菜南街。此外，佢更多次詢問噴泉嘅用水量同開支，又話政府鼓勵市民珍惜用水，質疑政府唔使交水費時係咪可以放肆用水。
建制派則批評泛民拉布，其中梁志祥指泛民「雞蛋裏挑骨頭」，何君堯則批評泛民拉布拉得不智，更指泛民應對治安有信心，「驚唔驚大媽、驚唔驚大巴同建設無關係，如果驚就唔好去啦」。