政情：張華峰諷陳淑莊 終認同高鐵效能
廣深港高鐵香港段自提出以嚟一直都爭拗不斷，早前審議《廣深港高鐵（一地兩檢）條例草案》時，一眾泛民立法會議員更多次拉布同衝擊會議，但公民黨（公文袋）議員陳淑莊尋日一反過往作風，喺立法會大會上就高鐵提質詢，問咗好多執行上嘅細節，搞到金融服務界議員張華峰都忍唔住寸佢，話陳淑莊終於明白同認同高鐵嘅效能，仲好清楚箇中細節，絕對值得欣賞，仲話係佢第一次喺會議上公開稱讚泛民議員！
扮記者追問陳帆
陳淑莊唔止關心高鐵，沙中線嘅工程問題都一樣跟到足，就連運輸及房屋局局長陳帆回應記者提問嘅時候，佢都坐咗喺一眾記者背後，扮成記者一齊向陳帆提問，仲愈問愈大聲，可惜唔知陳帆係聽唔到抑或係認得出陳淑莊把聲，由始至終冇回應過佢，反而事後唔少記者都同陳淑莊講：「嘩，你真係好大聲。」甚至有人問佢係咪諗住轉埋行做記者，但佢就只係不斷笑，冇正式回應。