政情：回收基金行政費高 黃錦星變大嘥鬼

年耗千萬稱合理 嚇親陳克勤

回收基金喺一五年成立，供回收商申請資助以提高作業能力及效率，民建聯立法會議員陳克勤尋日喺立法會提出口頭質詢，批評基金行政費高昂。佢解釋，作為基金秘書處嘅生產力促進局，用於處理基金申請、監察項目進度及進行合規檢查方面開支高達一千三百萬元，佔已批出資助總額一成二，即平均每個獲資助項目嘅有關開支高達十萬元，佢關注政府有否檢討有關開支水平係咪過高。

星星喺首次回應時，話基金秘書處喺處理申請、監察及查核方面嘅一年開支約九百萬元，當中生產力促進局（生促局）額外承擔予部分開支，包括提供督導人員、場地租賃同技術支援等。星星強調秘書處嘅支出係合理水平，而截至今年五月中，基金諮詢委員會共接獲三百八十六個申請，共有一百三十九個獲資助項目已經或即將開展，涉及資助金額共約一億元。

星星就係因為「合理水平」嘅形容，就辣着咗一向關注環保議題嘅克勤，佢一方面對星星嘅答覆感到震驚同失望，其後又話基金批出項目金額介乎六千至一萬元，其實係比比皆是，依家要十萬元行政費用批出數千元項目，直言「啲錢唔係你（黃錦星）嘅，都唔應該做大嘥鬼，洗腳唔抹腳」。

泛民諷「佛系基金」 促主動出擊

最近捲入涉搶手機事件嘅民主黨（白鴿黨）議員許智峯亦加入戰團，諷刺基金係「佛系回收基金」，以為緣分到了，回收率就會上升，佢關注當局會唔會喺廚餘回收方面主動出擊。

星星回應時就話當局有主動出擊，包括繼續支援學校同私人屋苑安裝堆肥機；至於基金秘書處工作，佢話唔單止係處理行政工作，仲有各項專業服務，加上由於行業水平參差，故有部分資助項目金額會較細，以便業界人士申請喎。

不過一句到尾，若然星星唔想再畀議員炮轟係「大嘥鬼」，就要度橋諗吓有乜辦法令基金嘅行政費用降低，否則下次再討論同一議題時，難免會再遭到克勤等議員狙擊批評嘞！