中環出更：TSA爭議 楊潤雄寸議員「一時一樣」
教育局早前已決定喺今年恢復小三全港性系統評估（T S A），當局會抽出每間公營同直資學校小三學生參與評估，校方亦可自行申請全校小三學生參與評估。立法會教育界議員葉建源喺立法會提出口頭質詢，指至四月底已有二百三十間小學選擇全校小三學生參與評估，要求教育局交代申請全校參與評估嘅學校學生數目資料，學校種類等。教育局局長楊潤雄就話當初係議員話教育局公開施壓，所以局方先冇再向考評局過問有關資料，依家又話佢哋冇資料，寸爆議員「一時一樣」。
初斥教局施壓校方 現反求資料
楊潤雄喺會上回答葉建源質詢時話，教育局並唔掌握有關資料，亦唔會向考評局查詢。多名泛民議員一聽到局方話冇資料，就即刻咬住唔放。其中民主黨（白鴿黨）議員黃碧雲就話唔明白點解可以唔公布資料，搞到咁秘密，又質疑唔知係教育局用考評局做擋箭牌，定係教育局同考評局打龍通，批評楊潤雄不負責任，而同屬白鴿黨嘅議員許智峯亦都質疑，有成二百幾間小學係申請全校小三學生參加評估，根本就對減輕操練冇幫助。
唔知係咪因為「天口㷫、冇祈禱」，楊潤雄似乎都沉唔住氣，話過往教育局被指畀壓力學校，所以當局先公開承諾唔問邊啲學校參與評估，所以依家先冇資料，議員「一時一樣」，令佢哋好難做咁話。
卓妮