中環出更：上海買衫結緣莊莎娜撐本地原創
好多人都怕同人撞衫，幫襯設計師品牌就最穩陣。珠寶設計師莊莎娜（Sarah）身兼科幻小說作家，對着衫梗係有高要求。佢話幾年前喺上海一個匯集中國設計師品牌嘅商店買咗件衫，諗住支持吓原創，直至前幾日先發現件衫係本港時裝設計師丘雪祺（Cecilia）設計，真係好有緣分。
Sarah話當日買嗰件衫設計好立體、有層次感，依家同Cecilia相熟咗，其實應該一睇就知係出自佢手。講起近況，Sarah話設計緊訂婚戒指。咦？唔通佢有好消息？小妮子笑笑口話唔係幫自己設計，而係同內地一個品牌Crossover，不過好多朋友一聽到佢設計訂婚戒指，都係咁問喎！睇嚟大家都好緊張靚女花落誰家。
丘雪祺設計恤衫重玩味
呢一日係Cecilia同多位城中名媛攜手舉辦慈善恤衫義賣活動，包括香港前劍擊運動員何嘉麗，以支持香港乳癌基金會。Cecilia話講起恤衫，大家第一時間諗到嘅係好平板、好沉悶，所以佢加入咗好多玩味元素，就算男士着住返工都開心啲。做金融業嘅好友陳明輝當日就着住Cecilia設計嘅恤衫，以行動支持本地原創。
中華廠商聯合會永遠名譽會長李秀恒、仁濟醫院前總理李福生、香港青年聯會會董鍾浩文都有到場。香港乳癌基金會副主席劉李瑩瑩就話，由於女性不婚、不育同少餵哺母乳嘅比例與日俱增，導致罹患乳癌率逐年增長，所以仍需繼續推廣例行檢查嘅意識。
卓妮