外界質疑市區重建局以高價收購舊樓重建，再推出天價樓發售，有間接推高樓價之嫌。市建局行政總監韋志成尋日喺網誌解畫，話不論市建局或私人發展商，都面對「水漲船高」嘅高收購價，又預告喺「麵粉」價高昂下，機構顧及本身財務嘅可持續性同樓市狀況，發展成本將反映喺日後嘅樓價上。韋志成真係愈解愈衰，即係市建局同私人發展商出售嘅樓價只會愈嚟愈貴，係咁使乜要市建局做，抑或市建局都變咗發展商呀？
