政情：八網難逃：梁栢賢着袍呃Like慶細女畢業
醫院管理局行政總裁梁栢賢（PY）做乜會着住件畢業袍，仲要身在外國？原來唔係佢畢業，係佢細女大學畢業，因為開心得滯，借阿女件畢業袍嚟影吓相，放上Facebook「吸like」啫！有朋友睇完都話：「唔講係你位千金畢業，仲以為係你畢業典禮添！」
之前PY已預告五月會放個短假期，同太太、大女一齊去美國，參加細女大學畢業典禮。PY成家飛過去慶祝，仲開心到借阿女件袍着住「po」相上網，享受一家人快樂時刻咁話。
靚相成功吸近五百個Like！朋友見到都紛紛留言恭喜佢，兩個女都畢晒業，做父母就安樂晒！前線醫生聯盟副主席蕭旭亮亦有留言話：「唔怪得可以退休原來細女都出身了！」亦有朋友提醒佢下年要退休，即是都就快輪到佢「畢業」喇喎！所以要繼續做好餘下工作，唔好令市民失望呀！