政情：去開幕禮被追數 羅致光陳帆急逃
立法會議員尹兆堅（肥尹）同葵青區議員林紹輝嘅葵涌石籬邨聯合辦事處尋日開幕，請咗勞工及福利局局長羅致光、運輸及房屋局局長陳帆主禮。不過，肥尹同林紹輝見局長如見曙光，即場提出多項訴求，又交請願信，追到羅致光同陳帆走夾唔抖！
肥尹林紹輝趁機請願
林紹輝致謝詞時話，做議員寫投訴信好浪費時間，佢有咩就直接搵部門拆掂佢，既然兩位局長在場，希望運房局喺葵涌大隴街興建扶手梯時，再起埋升降機喎。至於勞福局，林紹輝就想局方投放更多資源做安老。呢頭講完，林紹輝同肥尹喺完咗儀式後，又再向陳帆遞信，要求新出售綠置居價格要同市場脫鈎。
肥尹仲同兩位局長傾吓附近嘅設施等，兩位局長好快傾完食兩舊燒肉，就急急逃離現場。好哋哋一個議辦開幕禮，竟變成請願狙擊，唔知下次仲有冇人敢嚟呢？