政情：象哥屋企收埋咗間五金廠
行街購物唔係女人嘅專利，立法會議員黃定光（象哥）都係一放假就會走去行街買嘢，不過佢就唔係去買衫褲鞋襪同手袋，而係行鴨寮街、新填地街，買吓啲工具或者得意嘅嘢喎。佢仲話有個私竇，公餘時間就會去「錘錘揼揼」o架喇。
架生齊全 方便解手癮
究竟象哥去私竇「錘錘揼揼」啲乜？象哥就話，個私竇入面有個書房同工作室，架生齊備，有埋鋸床、鑽床等。以前好多嘢佢都會自己維修，連修補死氣喉都係自己搞掂，不過依家就冇喇，只係喺屋企換吓光管同鑽吓嘢。
原來象哥爸爸以前係做五金，專做金屬擠壓，聽聞仲係香港第一個用呢個方法嘅廠家。象哥話，將啲銅、鋁之類嘅金屬買番嚟熔咗佢，再放入機器，然後好似唧牙膏咁唧出想要嘅形態，加工後就可以做出常見嘅配件，如門鉸、鋁窗框等。象哥又話，當年讀完書返港，因為對呢方面好有興趣，好想去廠度幫手，奈何爸爸唔畀，要佢返寫字樓，所以惟有依家整個小工場，解吓手癮咁話。