政情：防疫自保 施榮懷勤洗手少握手
自從爆發沙士疫情之後，勤洗手就成為一種清潔運動，仲有人提出「拯救生命：從清潔雙手做起」嘅倡議。中華廠商聯合會永遠名譽會長施榮懷（Irons）都有一套防疫自保嘅方法，佢話出入公共場合之後，無論係咪留低食飯，都會洗完手先至走，仲有唔會主動同啱啱喺洗手間出來嘅人握手，點解？
怕人去完廁所唔洗手
Irons話一來自己唔習慣隻手濕濕哋咁同人握手，二來真係有啲人去完洗手間唔洗手。所以如果自己洗完手出來，雙手仲濕濕哋，就唔會同人握手。明知對方啱啱喺洗手間出來，就更加唔會主動搵人握手喇！萬一避免唔到要握手點算？佢笑笑口話會即刻入洗手間再洗過喎！以為Irons有潔癖？唔係嘅，否則佢就隨身自備消毒液喇！