中環出更：唔想拎「退休」牌 張建宗好尷尬
政務司司長張建宗（小肥張）曾自嘲係工作狂，「有得打呔就興奮」，佢尋日出席一個有關香港青年發展嘅研討會，大會準備咗多款寫有內地發展機遇嘅紙牌畀嘉賓，包括金融、就業、旅遊同科技等，以進行啟動儀式。小肥張取了紙牌後就想同隔籬嘉賓交換。點解小肥張要換塊紙牌畀人呢？原來佢塊紙牌寫住「退休」兩字，難怪佢咁唔情願喇。
預先設計 交換唔到
小肥張一獲派紙牌時已笑笑口，想同企喺隔籬嘅嘉賓政制及內地事務局前局長譚志源等人交換，但最終因大會裝置已預先設計好，最終都冇交換到。小肥張惟有舉起「退休」紙牌，可能大會司儀都見到小肥張尷尬嘅笑容，即時打圓場話大家都唔想佢咁快退休嘅。
另外，譚志源喺活動上自爆早前去上海做嘢，想喺當地銀行開戶口。銀行職員問佢有冇上海工作證，佢話喺香港做嘢，職員又問佢有冇身份證，佢話只有回鄉證，結果搞咗成朝都開唔成戶口。之後佢喺內地機場食麵，點知又因為冇手機支付系統，畀唔到錢，最後要由佢老闆找數。譚講笑話好彩係老闆請，都叫天經地義喎。
卓妮