中環出更：王嘉恩感嘆港青搵錢唔追夢
青年夢想實踐家協會（協會）早前為新一屆青年夢想實踐家選舉做宣傳騷，唔少往屆得獎者現身分享。活動籌委會主席王嘉恩（Albert）慨嘆社會價值觀仍然好重視物質，年輕人經常因為想搵多啲錢而放棄夢想，亦有人覺得夢想即係發夢，唔現實，但Albert認為成功圓夢嘅例子唔少，有夢想絕對唔係壞事嚟！
香港雙節棍總會創辦人劉萬梁就話，細個睇過已故功夫巨星李小龍嘅電影之後，就被雙節棍深深吸引，試過用地拖棍、拖鞋、臘腸等自製唔同類型嘅雙節棍，實行自學咁話！不過佢父母都唔支持佢玩武術，認為冇出息，所以咁多年都只可以偷偷地玩，直到早幾年成功開武館，先至獲爸爸認同咋！
彭芷君話肯做就有機會
死亡學院士暨社工梁梓敦都係往屆得獎者，一見到佢嘅頭銜，相信唔少人都呆一呆。梁梓敦話因為做社工接觸好多長者，免不了要同長者傾死亡呢件事，所以去咗外國修讀死亡學添！佢話大家以為長者好忌諱提到死，其實呢個諗法係錯嘅，反而好多長者覺得離死亡不遠，都唔介意提及，只係唔識得同後生一輩溝通。梁梓敦仲教路話，例如可以喺拜山嘅時候，講吓「呢度附近環境都唔錯」之類嘅話，再同長者打開關於葬禮嘅話題，情況就好似自己生日都想自己話事去邊度慶祝一樣。
今屆選舉初審評審彭芷君有個八歲嘅仔，佢話今時今日讀唔讀到書已唔係最重要，一個人有冇料都未必同成績掛鈎，只要個仔肯做，相信一定會有實現夢想嘅機會。
卓妮