政情：今日你上鏡：陳岳鵬戴四方帽：要令世界更美好
政制及內地事務局前副局長陳岳鵬（Ronald）上年為咗遠赴美國進修而辭官。不過離開官場未夠一年，就已經完成課程順利畢業喇，唔知佢下一步有咩打算呢？
Ronald上年入讀哈佛甘迺迪學院修讀公共行政碩士課程，不時都會喺社交網站上載校園相片。尋日佢就上載咗多張身穿畢業袍、頭戴四方帽嘅相片，仲講明現時係時候回饋社會，令世界變得更美好咁話。
新動向惹關注
佢喺每一張畢業相中都展露其招牌笑容，真係齋睇相都感受到佢嘅喜悅，網友都紛紛留言祝賀，其中唔少人關心佢嘅最新動向，包括勞工及福利局前局長蕭偉強。蕭偉強仲問Ronald幾時再戰江湖，睇嚟唔少人都好想知佢會唔會走番入政府熱廚房噃。