二○一六年立法會選舉建築、測量、都市規劃及園境界議席由民主派參選人姚松炎勝出，姚松炎被取消議員資格，先由該界別前議員謝偉銓重奪議席。建築界選民來自四大學會，其中園境師學會早前就有會員提出動議修章，要求取消準會員喺周年大會嘅投票權。學會尋晚舉行會員大會，有關動議獲投票人數三分之二贊成通過，意味該會準會員將喪失立法會及特首選委選舉投票權。
園境師學會會員分四種，包括退休會員、資深會員、專業會員及準會員。準會員係指只具備相關學歷，但未通過專業試及有足夠經驗人士，唔少年輕會員都係準會員。由於準會員人數近年不斷上升，故有人就提出修章，以免學會被準會員主導。據了解，議案需獲投票人數三分二贊成先可通過，尋晚就有一百零二人投票，七十八人支持取消準會員投票權，反對嘅只有廿四人。
消息指，有資深會員認為過去準會員喺學會有唔少貢獻，覺得佢哋嘅投票權唔應該被削，所以提出修正案，以保留準會員投票權，包括限制準會員出任理事會成員嘅人數，不過有關修正案都不獲通過。有會員就對投票結果感到失望，認為會令準會員士氣大減，甚至令準會員覺得被矮化咁話。