政情：工聯會立會初選 何啟明 陸頌雄只能活一個

勞工界轉戰直選跑道，有成功個案如郭偉強接棒香港島議席，但亦有失敗例子如鄧家彪。而下屆將要由「旋轉門」跳出來嘅就係何啟明同陸頌雄，其中何啟明係觀塘區議員，雖然立法會九龍東議席一直由KK坐緊，但外界盛傳KK做埋今屆就退休，九龍東議席將交棒畀何啟明，黨內對有關說法亦深信不疑。

至於陸頌雄處境就尷尬得多，本身係元朗區議員，但所屬嘅立法會新界西選區已經有麥美娟坐鎮，佢嘅去向曾經流出多個版本，包括開拓工聯會未有插旗嘅九龍西，又或者同鄧家彪鬥爭位出戰新界東。

初選制為陸頌雄開路

不過，上述形勢隨着工聯會領導層早前換屆，一個決定將一切推倒從來。據了解，工聯會會長吳秋北早前一錘定音，表明倘若KK退休而空出九龍東議席，必須透過黨內初選去決定接任人，聽落真係夠晒民主。消息人士話，雖然初選制度看似中立，聲稱係推動良性競爭，但實際效果就等同為陸頌雄空降九龍東爭位「開路」。

何啟明想突圍要諗計

其實何啟明同陸頌雄對於黨內初選應該唔陌生，佢哋喺二○一六立法會換屆選舉前，就係經自薦同黨內篩選後而成為勞工界議員，只係兩人由當年嘅勝出者，日後隨時變成競爭對手。據悉，假如陸頌雄決定爭九龍東議席，屆時兩人就面臨「兩個只能活一個」嘅局面。

眼見鄧家彪目前仍為立法會議席頻頻撲撲，相信何啟明同陸頌雄都明白二○二○立法會換屆選舉呢一戰不容有失，而面對陸頌雄嘅挑戰，原本「坐定粒六」等接棒嘅何啟明，睇怕未來一段時間將會有得震、冇得瞓，要打醒十二分精神，若要突圍就要認真諗吓計。