中環出更：教醫療安全 陳帆唔敢(目及)俏護士
運輸及房屋局局長陳帆係機電工程師出身，八十年代已加入政府，但原來佢仲教過書，學生仲係一班俏護士添！
屋企主要負責換燈膽
陳帆早前出席教育專業人員協會活動時自爆係教協會員，佢係三十幾年前任教夜校時入會，當年佢係教醫療安全嘅，即係有關如何安全應用醫療儀器嘅知識，所以當年唔少學生都係護士。佢大讚當年嘅學生好乖，甚少走堂，又話夜校生通常都好有心讀書，非常勤力。咁佢當年有冇俏護士學生先？陳帆就呆咗呆、諗咗諗，話真係冇留意，仲話當年已經結咗婚。唔通佢怕睇女仔會畀太太扭耳仔？
另外，有工程師背景嘅陳帆平時喺屋企自然要負起維修家庭電器嘅責任，不過佢竟然話，最主要都係換燈膽咋。乜咁大材小用呀？佢就話，依家嘅電器都好襟用，好似屋企嘅大牛龜電視咁，用咗廿幾年都未壞，直至要睇高清電視先逼住換，佢仲話自己都唔捨得換添喎。
卓妮