中環出更：首公開演講 劉文文魂遊太虛
唔少人公開演講或喺公司簡介工作畀同事聽時都會好緊張，口窒窒，點樣可以講好啲都真係要諗吓計。青少年發展聯會副主席劉文文早前出席一個納米電影創作比賽嘅頒獎典禮時話，佢第一次演講時要對住幾百人，特別緊張，不時低頭望稿，但佢抬起頭時，唔知點解對眼失去焦點，好似魂遊太虛咁，反而冇咁驚，聽落都認真算係奇招。
劉文文話，依家演講間唔中都會「食螺絲」，不過如果係佢熟悉嘅禁煙議題，就唔使稿都「從心而發」講得好順暢。身兼聯會會長嘅觀塘區議會主席陳振彬就話，佢第一次上台演講時都嚴陣以待，出發前三小時不斷背稿。依家有時去一啲場合，主辦單位都有指定講稿叫佢上台講，佢話有次台上周圍打晒燈，淨係得份稿打唔到燈，搞到佢焗住要攞起份稿嚟讀，相當尷尬，所以佢之後出席活動，都會喺上台前留意燈光，如果唔多妥就先提醒一下大會。
商務及經濟發展局副局長陳百里同潮屬社團總會會董林月萍都有出席當日活動。陳百里話，第一次公開演講時都覺得好緊張，要睇住稿講，依家演講就會只記要點，仲話演講記要點要同拍納米電影一樣，將最重要嘅嘢濃縮。不過佢都承認有時都會有甩漏，如果內容係佢所屬嘅政策局範疇就會好好多，因為通常已經講過好多次喎。
林月萍：最怕讀錯人名
林月萍話，最記得就係有次要用普通話演講，因為普通話麻麻哋，事前已經搵老師幫佢讀一次，佢錄低咗後不斷翻聽，以防讀錯。佢又話，最擔心係讀錯人名，有時主辦單位資料有錯，佢唔太熟又照讀就會出事，所以依家有人邀請佢做司儀，佢都會選擇吓，如果係唔太熟嘅組織都未必會做喇。
卓妮