政情：盧偉國私房菜 教整「肥燶瘦叉燒」
工程界立法會議員盧偉國向來鍾意露兩手，大玩中西式樂器，但原來佢仲入得廚房，好似尋日佢就喺網上分享點樣自家製「肥燶瘦叉燒」，仲講明係盧家私房菜喎！盧偉國早前喺母親節已經介紹過「黯然銷魂飯」，即叉燒煎蛋飯，因而引來唔少朋友追問佢點樣自製叉燒，所以佢尋日就順應民意，詳細介紹點樣喺屋企用焗爐整叉燒。
一定要買「第一刀脢頭」
盧偉國教得好詳細，仲由去肉檔買材料開始講起，提醒一定要指明買「第一刀脢頭」豬肉，因為半肥瘦又帶雪花，夠惹味且有口感，直言係最啱用嚟整叉燒。至於醃料方面，佢就話要用某一品牌嘅叉燒醬，之後可以按個人口味加上老抽、糖等，但最重要係落玫瑰露。
至於醃肉用剩嘅汁，佢就話要留起，因為煮熱同加蜜糖後可用嚟反覆搽上焗好嘅叉燒上，如果加埋麥芽糖就最好喎。估唔到呢位工程界代表會踩過界撈埋飲食，呢個叉燒教學真係夠晒詳細喇。