政情：補選花156萬 區諾軒靠「衝刺」包底
香港眾志前常委周庭喺今年三月立法會港島區補選中未能「入閘」參選，民主派改派南區區議員區諾軒作「Plan B」。已當選立法會議員嘅區諾軒向選舉事務處申報選舉開支資料，資料顯示佢補選使咗約一百五十六萬六千元，不過亦獲約一百五十六萬二千元選舉捐贈，當中由一間名為「Chung Chi Limited（衝刺有限公司）」捐出近一百三十七萬元，佔選舉開支近九成。而呢間「衝刺」公司嘅董事就係眾志成員。
眾志成員係公司董事
根據公司註冊處資料，「衝刺」董事為吳天賦，公司秘書為廖偉濂，早前已有傳媒踢爆二人均為眾志成員。而區諾軒選舉期間都請咗唔少眾志成員，包括新任主席林朗彥、副秘書長陳珏軒、常委鄭家朗及已退出眾志嘅袁嘉蔚，佢哋分別擔任區諾軒嘅日程秘書、拉票人、媒體製作、行政幹事等，眾志真係出錢又出力。
區諾軒除咗有「衝刺」資助，亦得到公民黨同佢已經退出咗嘅民主黨捐贈。佢最終只需自掏腰包三千多元。