政情：開會壞燈 議員摸黑對談

開會開到咁有情調，其實係因為喺會議舉行期間，會議室後排射燈失靈，喺會議室突然變暗一刻，議員都起哄。之不過因為大家都睇到大家，所以就冇暫停會議，只係叫咗立法會工作人員了解一下照明系統出現乜嘢問題。

張國鈞笑言首次「挑燈夜讀」

議員張國鈞因為坐喺會議室最後排，因而要開着座位上嘅枱燈去睇文件，佢講笑話今次都係佢首次「挑燈夜讀」。而其他遲到嘅議員入會議室時，都被漆黑嘅會議室嚇一嚇，仲有人反問「睇戲呀？」

由於射燈一直未整好，內會會議最後都喺如此有情調嘅氣氛下結束。尋日立法會仲有財務委員會要開會，都係使用同一個會議室。好彩內會結束冇耐射燈已整好，議員先至唔使摸黑開財會審批撥款咋。