政情：白鴿黨 凍結峯鴿黨籍 講一套做一套

峯鴿因「峯搶手機」事件畀白鴿黨凍結黨籍，理論上佢暫時都唔可以代表白鴿黨行使職務，唔能夠以黨成員身份發言及行事，喺黨內會議亦都冇投票權。不過，有市民投訴，話呢幾日見到峯鴿擺街站賣白鴿黨獎券，而且其單張同橫額都有白鴿黨標誌，質疑峯鴿犯禁，繼續用白鴿黨牌頭行事。

用黨標誌賣獎券掛橫額 稱冇犯禁

而峯鴿對此亦都冇避嫌，仲喺社交網站上載自己喺小西灣同鴨脷洲西邨擺街站出售白鴿黨獎券嘅照片，照片可見佢仲有嗌咪籌款。照片中嘅橫額大大隻字寫住「民主黨」，而易拉架上亦印有該黨白鴿標誌。白鴿黨副主席羅健熙接受查詢時話，峯鴿只係被凍結黨籍，依然要履行黨員義務，包括賣獎券，又話峯鴿嘅單張同橫額上有白鴿黨標誌係冇問題，並冇犯禁。

如果係咁，即係峯鴿仲可以孭住白鴿黨招牌周街宣傳，咁同冇凍結黨籍又有乜分別呢？難怪該黨主席胡志偉都唔肯確認，峯鴿係咪唔可以用黨名義出戰明年區議會選舉喇。

此外，尋日立法會內務委員會開會，繼續爭論政府「狗仔隊」人員到立法會監察議員的問題。內會主席李慧琼引述當局話，政府工作人員係執行通傳及應變工作，唔會騷擾議員，亦會即日刪除資料，強調有關做法實屬必要，而且亦符合公眾利益，但就會提醒各部門保持低調，唔好派過多人員，希望行政機關同立法會互惠互諒。

公民黨議員郭家麒聽完就不滿政府嘅講法，反問政府係咪覺得議員「低能咗啲」，唔識開會同投票，仲話係有啲侮辱，令行政立法關係緊張，削弱立法會形象。工聯會議員黃國健就反駁，話認同有「低能議員」需要政府提醒，因為有人長期唔進入會議廳，確實係需要有公務員協助確保唔好會流會喎。