中環出更：教授上身 羅致光放假交低「功課」
勞工及福利局局長羅致光加入政府「熱廚房」前，一直喺香港大學擔任講師，唔知係咪做慣老師，當咗政府係學校，早前佢放假就交低咗唔少「功課」畀下屬，仲叫下屬如果有問題就用電郵搵佢。而佢身在外地都仲「秒覆」同事查詢，十足十「教授」一樣。不過佢嘅「學生」、勞福局局長政治助理馮興禮（Henry）就坦言有壓力喇。
「學生」馮興禮認壓力大
勞福局負責嘅議題唔少，包括取消強積金對沖、虐兒問題、安老院舍人手等。羅致光早排雖然放假，但就交低咗唔同「題目」畀下屬處理。有收到「功課」嘅勞福局官員話，羅致光雖然喺海外，但都好似冇時差咁，可以喺幾分鐘內就回覆電郵，成班下屬就好似變咗大學生咁「電郵問Lecturer（講師）功課」，難怪羅致光之前寫局長網誌時，都曾經自嘲「教授上身」啦。
局長放假，勞福局副局長徐英偉（Caspar）同Henry係咪最多功課呢？Caspar就話羅致光只係放假前已做好工作交接，仲大讚上司細心。不過Henry就承認「好多功課要做」，雖然冇話幾時交功課，但咁樣仲大壓力，所以會盡快完成喎。
卓妮