政情：楊靜自創潮牌 囡囡做軍師
做珠寶批發生意嘅中華廠商聯合會會董楊靜（Sally）同老公朱容基喺舊年年底轉戰珠寶零售市場，自創寵物潮牌，最近愈做愈起勁，事關呢條路線喺中港市場反應好好，唔單止成為香港貿易發展局旗下設計廊熱賣嘅香港珠寶品牌，仲即將喺上海開一間網紅店添！
網紅店要真人坐鎮
Sally笑稱係自學做品牌，近排經常喺前線緊貼市場，覺得好有趣。市場千變萬化，早幾年實體店受到網絡衝擊，但現時實體店同社交網站銷售渠道就一樣咁重要。例如內地最近流行網紅店，即係請網絡紅人喺社交網站打響品牌之餘，仲要真人坐鎮實體店以吸引粉絲，真係唔講唔知。
講講吓，Sally笑稱有時自己跟唔上年輕人嘅諗法，要搵十幾歲嘅女兒做軍師，請教佢嘅意見添！